بسم الله الرحمن الرحيم

الناس في عالم وانا في عالم آخـر يـا سعيـد=بين الرجاء والياس لا جازع ولا عندي صبـر
أحس كني في الفضاء الواسع مكبـل بالحديـد=والأرض تحتي كنها درهـم وضيعـه البصـر
وسهيل والجباروالشعرى بدت لـي مـن بعيـد=عقد أنفرط سلكه علـى غفلـه ولؤلـؤه أنتثـر
من بعد ما كانت تشكل في السماء منظر فريـد=حبات لؤلؤ في وسط عقدعلـى جيـد القمـر
من هم يشعل في خفوقي مثل نار فـي جريـد=شب بحطب عوج محاني دون صدري والظهر
تقذف حممها في عروقي من وريد ليـا وريـد=منها معاليق الخفوق تـذوب والقلـب أنصهـر
واعوي عوى سرحان يعوي للعشا في راس حيد=ويجاوبنه اذياب يتعـاون قبـل وقـت السحـر
ولا أنا من هـويجاوبنـي وخلـق الله هجيـد=تعصف بي أحزاني ولا حد قال علمك وش لمر
عليك يا زبن المقلـة راعـي الـراي السديـد=يا مكرم الضيفان يا سمـح الجنـاب المعتبـر
يا صاحب الطالات يالضرغام يالصلب العنيـد=يا شيخ يفدونـك مشايـخ مـا يوفـون الشبـر
وفداك من لا يرتكي للحمل في اليـوم الشديـد=وفداك من شره منـع خيـره ملـك ولا نفـر
ما ودي بفرقاك لكـن شوفـك لحزنـي يزيـد=إن غبت عنك قهر يامشكاي ون زرتـك قهـر
ودي ولا ودي واريد ومـاأريـد اللـي أريـد=جمعت قاموس التناقض واختصرته في سطـر
ودي أراك بعافية تملـى هدومـك مـن جديـد=وتقـوم متعافـي بحـول الله ويـزول الكـدر
وما ودي آشوفك كذا جسمك غدا مثـل القديـد=سلم قياده للسريـر ومـابقـي غيـر النظـر
يا ويل حالي كلما ناظـرت لـي نظـرة تفيـد=إني مقصر فيك يابـن العـم مـن دون البشـر
فاشره وعاتبني ومثلك لاشره لـه مـا يريـد=تامر وتنهى كان غيرك مانطيعـه لـو أمـر
معيار قدرك عندنا الثانـي بعـد عمـك فهيـد=إي والذي يسمع دبيب النمل في صـم الصخـر
والله هو العالـم بمـاتخفـي وتبديـه العبيـد=إنك علي أغلا واعزانسان يـا ذيـب الغـدر
من ذبذبات القلب جاتك صادقـة قـول وكيـد=لكـن مـا باليـد حيلـه فـي مواجـهة القـدر
ولا معي غير الدعاء يابـو علـي ربـه يفيـد=لنه سلاح المؤمن الصادق وهو سيـف النصـر
يا حي يـا قيـوم يارحمـن يالمبـدي المعيـد=يارافع السبع الشـداد بـلا عمـاد ولا وطـر
والارض باسطها وداحيهـا لخلـق الله صعيـد=مع ان يابسهـا ربـع واحـد وباقيهـا بحـر
ومرسي أوتاد الجبال الشاهقـه كـي لا تميـد=واجريت فوق اسهولها الأنهار وانبـت الشجـر
يالواحد الماجد إله الكون ذو العـرش المجيـد=ياحامل ثقال السحـاب اللـي محمـل بالمطـر
ادعيك باسمـاك العظيمـة يـاودود وياحميـد=تشفيـه وتعافيـه يـاربـاه وتزيـل الضـرر
وتمد له يـارب فـوق العافيـة عمـر مديـد=ياعز واكرم مـن دعينـا لا تغشانـا الخطـر
يافارج الكربات فرج هـم مـن همـه شديـد=انت الرحيم انت العظيم وما لنا غيـرك ذخـر