ياقايلٍ تكفـى ... بتكفـى شقينـا
ياما لجل تكفى لقينـا المضـرات
ياما لجـل تكفـى نزلنـا ورقينـا
وياما تجشمنا الدروب العسيـرات
تكفى تـرى تكفـى دمـارٍ علينـا
تكفى دمار اهل الكـرم والمـروات
باسبابهـا صرنـا لهـم كافلينـا
ولاجنينـا الا الزعـل والغرامـات
كم ليلـةٍ لعيـون تكفـى سرينـا
نسري لجل تكفى على غير مشهات
وياما حملنا ارواحنـا فـي يدينـا
والعمر ماياقـاه كثـر المـدارات
كم غاليٍ لعيـون تكفـى عطينـا
نعطي ولانحسب حساب الخسارات
وان قلت تكفى قلت ابشـر وجينـا
نجيك لو دونـك بحـورٍ غزيـرات
نسوق لجلـك كـل شـيٍ ثمينـا
نجيبهـا بالمـال والا الوجاهـات
على البلا نصبر إلـى مـن بلينـا
نصبر على شيل الحمول الثقيـلات
لاتستغـل الحلـم والطيـب فينـا
الحلم له حـزه وللطيـب حـزات
كم جاهلاٍ لعيـون تكفـى نصينـا
وكبرت بعين الجاهليـن التفاهـات
الجهل أعيَـى كـل طـبٍ مكينـا
من عصرآدم لين عصر الحضارات
اخشـى عليكـم ساعـةٍ تعترينـا
نسرج بها خيل الجهل للجهـالات
دام الدواء جهلٍ علـى الجاهلينـا
نجهل جهل اعوام في ظرف ساعات
نجهـل وحنـا للجهـل كارهينـا
مضطر والمضطر يرقى الصعيبات
ياللي تقول الحـزن خيـم علينـا
الحزن بعض احيان للنفس ملهات
منذ /09-06-2010, 06:42 AM
تكفى تـرى تكفـى دمـارٍ علينـا .. تكفى دمار اهل الكـرم والمـروات 
المواضيع المتشابهه 
العرض العادي
