ياعيون الشعر هلي المدامع قصيد = وانظميها قلايد فوق جيد المهاه

رصعيها ذهب والماص توه جديد = من جواهر صدفها غالي مشتراه

واندبي من سمان الهرج مقطع فريد = إبتكارات مابغي من قديم الرواه

هاتي اعلوم جزله وانتخي كل جيد = واتركي كل علم مايبل الشفاه

الشعر منبر إعلامي يهد ويشيد = وأجزله ماتفاعل مع هموم الحياه

شعر ماسل سيفه دون مجد تليد = فاتركه للغواني يستحثن خطاه

شعر ما يجعل الجمهور يطلب مزيد = مايسمى قصيد ولا يذعذع هواه

والنخل كان ما يثمر بطلع نضيد = ماسقاه المزارع من ينابيع ماه

في خظم المحيط الهادر ابدي واعيد = بين مده وجزره كل صبر الكماه

وماعرفنا نقارب بين سعد وسعيد = كل منهم يقوض ما خويه بناه

في فروع المسائل مشعلين الوقيد = والثوابت تغازلها عيون العصاه

بالمكايد تزعزع باسقات الجريد = والنوامي تذكرني مقيط ورشاه

مالصم الصخر ياكون صلب الحديد = ومايشيل اللحم عظم شكى من وناه

والبيوت الشعر والبل وحرة قديد = ما استمالت هل النرويج حتى غزاه

مالها غير أهلها بالكلام المفيد = واترك اهروج لاتسمن ولا به غناه
بس كمن مغفل يوم شاف السويد = أرضها غارقه بالثلج جاه انتباه

قال وش حيلة يصبح ركام الجليد = في وسط نجد مابين الحسا والسراه

ما عسانا نؤمل من نباهة بليد = طش في جارف التيار طوق النجاه

وما عسانا من افكار الغبي نستفيد = كان هو ما استفاد وفاق مما دهاه

ياهل الماريوت ان كان فيكم رشيد = يضبط البوصله ويصوب الإتجاه

غركم من توسمتوه ركن شديد = من تماديكم أوصلتوا التمادي مداه

تدعون التحرر وانتوا أصلا عبيد = وتدعون التقدم وانتوا أصلا رعاه

عندما غرد الشيحي وحلق وحيد = ثار بركانكم حتى مليتوا فضاه

وماتركتوا وسيله من قريب وبعيد = في الصحافه وعبر النت حتى القناه

حرب قذره قذايفها صراخ ووعيد = من جميع المحاور لكن الله وقاه

وغرد غرابكم ياعل ماله حفيد = قال وين الإله اللي زعمتوه إلاه

والعقيده طقوس وفكر بالي عتيد = وقلتوا ابداع يا حمزه جذبنا سناه

من عماكم تخيلون البساتين بيد = والصحاري الجديبه روض ينثر شذاه

وتحسبون العقارب والثعابين صيد = طير برمان رايدكم وسرتوا وراه

ومن تبع جرة المعثور ماجاب فيد = ومن تحكك بلجرب حل داه برداه

فعلا هو منبر مهم ومسموع عند الأغلبية فهو ديوان العرب

ودنا لو فيه قصيدة عن سوريا .. يا شاعرنا المميز

صح لسانك واعتلى شانك

قصيدة معبرة وهادفة

تستحق البيرق طبعا بيرق الفرسان

تحياتي