غريبة قصة الدمعة على ذكرى فراق وبين
والأغرب قلبي الصابر على زلة محبينــه

حبايب عانق التاريخ ذكرانا سنه وسنيـن
ولا كنت أفتكر لو يوم ماضينا بتنسينـــه

رسمتك في خيالي قارب ومرسى على شطين
أنا المجداف وانتي يا حياتي موج تلفينــه

نعانق بعضنا لهفه وفا جامع دفا خليــن
بكل الحب أهديتك غلاي اللي تخبرينـــه

عمر طاف وبقى ذكرى حزينه وسط قلب اثنين
حبيبك ضاع تاه ومات كيف إنتي تهجرينـه

أمانه يوم قررتي تغيبي ما طرى شيئيـن
الأول كيف فكرتي حبيبك كيف تجفينـــه؟

وثاني شي يوم إنك على فراقه تبي تنوين
يهون عليك نوحه والدموع اللي اسكنت عينه؟

جروحه صارت أقرابه ودمعه حار وسط العين
وآلامه رسمها أبيات يكتبها وتقرينــــه

توقعت الزمن يقسى ويقطع للوصل حبليـن
ولكن ما توقعت إنك انتي رح تعينيــــه

حسافه كان لي آمال أرسمها معك يا زيـن
قطعتي كل آمالي وقلبي مات من حينــه

ألم وجروح وأحزان وقهر هي حالتي هالحين
وأفضفض واكتب أبياتي عسى ذالقاف تسلينه

ولكن بس أمانه أطلبك بالله أو تكفيــــن
إذا جابوا خبر خالد بكل الخير تطرينــــه

أمانه خبريهم قولي إنه طيب ومسكيـــن
أمانه علميهم وش كثر إنتي تحبينــــه

أمانه رددي في سجدتك دعوات مع آميـن
أمانه اغفري لي أي غلطه كان تلقينــه

أمانه اذكريني بالوفا ماابيك أبد تنسيــن
أمانه طيبي قلبي بكلمه منك يا زينـــه

ولك مني عهد بأنك بوسط القلب رح تبقين
حروف اسمك نحتناها بوسط القلب تحيينه

عسى ربي يحفظك يا غلا القلب ووفا الغالين
ويحفظ لك شبابك والعمر بالخير تقضينـه